طيب ليه ؟ لزومها شنو ؟؟ الغربة

ياغربة...ياغشاشة...يابكاية...يامستهبلة
تغرينا بي درهم قروش وراه قنطار بهدلة
جينـــــاك سنة أو قــــول سنين بنكمـلـــة
نبني البيوت في العاصمة وبي كوم أثاث بنجملة
وكرولا حارة نرسلها أصله التنقل مشكــــــلـــــة
ونكمل الدين بي مهل والسمحة جاهزه نحصـــلة
غير القروش الى الأهل عبر الشهور حنرسلة
والباقي يدخل في البنوك ونشوف دباره نشغله
ناس فكرت تجني العلم تبدأ الدراسة تواصله
أحلام كتيره وشيقة وآمال كبيرة نأملــــه
لكن حساباتنا الغلط في كل عام بنرحله
يا غربة يا بكاية يا غشاشة يا مستهبلة
والحسبه وصلت طأشرات أمكن نعيش وندبله
وتعال نحاسبك ياوهم من غير رقم أو أمثلة
كان للقروش نجري ونحوش لكن تقول بنشاكله
ماراضية تقعد في الجيوب وتقول حرامي بينشله
لكن بترقد في الضهور بي ديون تقيله مطوله
ممحوقه مابتقضي الغرض واقل حاجة تكملة
كملانة سفر وحق وزن ومجاملات مستفلحه
ضرائب ابعاج المشي والزامي حمدي نحوله
وأحلامنا صبحت زي السراب نمشي ونجري ما نحصله
ياريت يكون هم القروش يا غربة فيك هو المعضله
لكن تعال شوف الهموم الما افتكرنا نقابله
ذلة ومهانه واحتقار خلو النفوس متململه
سجنا كبير فيه الكفيل سجان قيوده مكبله
اشغاله شاقه ومؤلمه ودايما"مستعجله
ماعاد يكفيها النهار تحتاج ليالي مليلة
أمراض كتيره بدت معاك عايزه الفحوص المستعجله
ناس الضغط والسكري ومرض القلب وجع الكلى
مصران وقرحة واكتئاب ونفوسنا مامتحمله
وبنينا فيك كيمان لحم تحت الهدوم متندله
وأكيد يكون أكل المعلب والمجمد عامله
عدم الرياضه والكونديشن لابد يكون ليهن صله
وكمان تعال لمعادله ما قدرنا أصلا" نعدله
سجن العيال جوه الشقق وفراق الأهل والعائلة
جيب العيال بي جيبنا مال وجيوبنا غير مميله
وصغارنا صبحت بالزهج متوحشه ومتجفله
لا قادره تلعب في خلا لاضل شديره يضلله
لاقادره تدرس بي نفس من الدروس المزهله
تلقى الولد غالبو الكلام والبت كبيره مريله
كل الضغوط جاتم سوا ما قدرنا حتى نقلله
في كل طرف تلقى القرف تلقى الخيوط مداخله
ياغربة أديناك كتير أدينا خاطرك يسهله
خلينا نرجع بالفضل نلحق حياتنا نعدله
آمالنا فيك بدري أتنست الا الرجول متوحله
وبقينا زي أهل القبور لا البره عارف يدخله
لا الجوه يرجع لي ورا يحكي الحقيقه يوصله
لكن خلاص هان الخلاص عدك نزل مهما علا
أن شاءا لله نحيا نودعك وتكوني ذكرى نغازله
مرت سنين من العمر بنعزها ونفضله